Poet
chal nahin sakte vahan zehn-e-rasa ke joḌ-toḌ
un ki chalen hain qayamat ki bala ke joḌ-toḌ
hai nazar-andaz koi koi manzur-e-nazar
dekhna us but ki chashm-e-fitna-za ke joḌ-toḌ
kaj-ada.i baat hai jis ki lagavaT khel hai
siikh le us fitna-gar se koi aa ke joḌ-toḌ
pa ke qaabu karte hain ahl-e-gharaz kya danv-ghat
chalte hain matlab ki chalen mudda.a ke joḌ-toḌ
dost ban kar karte hain neki ke parde men badi
raj-niyyat ye hai dekho aghniya ke joḌ-toḌ
saḳhtiyan ustad hain insan ki duniya men ‘habib’
karte hain maghlub ko ghalib sikha ke joḌ-toḌ
Leave a Reply