Saqib Lakhnavi
main ro raha huun jo dil ko to bekasi ke liye
vagar na maut to duniya men hai sabhi ke liye
shab-e-firaq ki rozana afaten tauba
ye imtihan to hota kabhi kabhi ke liye
bahut si umr miTa kar jise banaya tha
makan vo jal gaya thoḌi si raushni ke liye
vasi.a bazm-e-jahan hai to ho mujhe kya kaam
jagah mili na miri hasrat-dili ke liye
ye aur daman-e-qatil hai chhuT ja.ega
lahu men josh to barson se tha isi ke liye
na aankh band karun main to kya karun yarab
vo aa rahe hain tamasha-e-jan-kani ke liye
bula ke mujh ko nikala hai apni mahfil se
vo nekiyan nahin achchhi hain jo ho badi ke liye
qafas men aaj tamasha-e-gham hai qabil-e-did
taḌap raha huun main sayyad ki ḳhushi ke liye
tamam ho ga.e ham ik nigah-e-qatil se
ragen gale ki taḌapti rahin chhuri ke liye
farogh-e-husn baḌha dil ki be-nava.i se
faqir ho gaya shan-e-tavangari ke liye
qafas men chup na hon to kya karun ki ye qaidi
na dosti ke liye hai na dushmani ke liye
tamam bazm men chhaya hua hai sannaTa
chhuḌa tha qissa-e-dil un ki dil-lagi ke liye
shikayat-e-chaman-e-dahr kya karun ‘saqib’
hava ḳhilaf hai lekin kisi kisi ke liye
Leave a Reply