dekh kar khush-rang us gul-pairahan ke haath paanv
phuul jaate hain javanan-e-chaman ke haath paanv
jab na dekhe chaar din us gul-badan ke haath paanv
suukh kar kanta hue ahl-e-chaman ke haath paanv
ham vo mai-kash hain jo hota hai hamen ranj-e-khumar
tutte hain saqi-e-paiman-shikan ke haath paanv
un ke maqtulon ki qabren is qadar khodi gaiin
thak ke takhta ho gae har gorkan ke haath paanv
aati jaati chot bhi sach hi nazar aati nahin
aj-kal chalte hain kya us tegh-zan ke haath paanv
khaksari ka maza hota jo ai khusrav tujhe
ab-e-shirin se dhulata kohkan ke haath paanv
hathkadi bedi badi zoron se pahnai mujhe
ai junun shal ho gae ahl-e-vatan ke haath paanv
kaat daala dast-e-shakh-e-gul ko pa-e-sarv ko
baghban ne dekh kar us gul-badan ke haath paanv
tausan-e-mushkin se jab us turk ki tashbih di
jod men thahre na ahu-e-khutan ke haath paanv
apne gesu-e-rasa se yaar rassi ki tarah
bandhta hai ashiq-e-chah-e-zaqan ke haath paanv
naujavanan-e-chaman us gul se tharrate hain yuun
jis tarah kanpen kisi pir-e-kuhan ke haath paanv
shab ko garm-e-raqs hota hai jo vo atish-mizaj
shama saan jalte hain saare anjuman ke haath paanv
hathkadi bedi jo mujh majnun ki utri baad-e-marg
qabr men tukde udaenge kafan ke haath paanv
ho gai kham thonk kar dev-e-khizan ke samne
kya kasile hain javanan-e-chaman ke haath paanv
shahid-e-maqsad tumhen be-vasta mil jaega
ai ‘saba’ chumo na shaikh-o-barahman ke haath paanv
Leave a Reply