har fasil-e-rah ko zer-o-zabar karte hue
main yahan pahuncha huun qarnon ka safar karte hue
tishnagi ab tak na sairabi ki manzil pa saki
zindagi guzri tavaf-e-bam-o-dar karte hue
bol ai bad-e-ḳhizan kyon aa gaya itna jalal
kuchh na socha baagh ko zer-o-zabar karte hue
jism saara ban gaya ḳhunin qaba ka aa.ina
ḳhar-zar-e-zindagi ko rahguzar karte hue
kitne mausam kitne roz-o-shab lahu karne paḌe
naḳhl-e-jan ko hamil-e-barg-o-samar karte hue
ek lamha bhi nahin lagta gulon ki shaḳh ko
phuul se alfaz ko nazr-e-sharar karte hue
asman chhune ki lalach men zamin par aa ga.e
josh maara ḳhuun ne kohsar sar karte hue
naqsh-e-pa chhoḌe the pichhe aane valon ke liye
ḳhaak men gum ho ga.e lekin ḳhabar karte hue
Leave a Reply