Poet
tire ruḳh ka kise sauda nahin hai
gul-e-lala talak sahra-nashin hai
phira hai aap vo mah-ru hamara
tira ai asman shikva nahin hai
kahin aisa na ho uTThe na talvar
yahi Dar hai ki qatil naznin hai
na puchho mere aansu tum na puchho
kahega koi tum ko ḳhosha-chin hai
adab se pa-barahna phirte hain ham
junun farsh-e-ilahi ye zamin hai
bura sab dushmanon ka chahte hain
main ḳhush huun jaise dil andoh-gin hai
rahe mazmun-e-gham ki tarah is men
hamara ghar hai ya bait-e-hazin hai
jahan hai jalva-gar vo ghairat-e-mah
ilahi asman hai ya zamin hai
banaya tujh ko aisa ḳhubsurat
ki nazan tujh pe surat-afrin hai
hain ishq-e-zulf men a.aza bhi dushman
hamara haath mar-e-astin hai
na nikla be tire main ghar se bahar
nigah tak chashm men ḳhalvat-nashin hai
falak jo chahe ham par zulm kar le
abhi to zabt-e-ah-e-atishin hai
paḌa hai tafraqa be-tabiyon se
‘vazir’ ab main kahin huun dil kahin hai
Leave a Reply