badan pe apne sarāpā azaab pahne hue
phir aaj niklā hai sahrā sarāb pahne hue
har ek shaḳhs kī nazroñ ko kar gayā uryāñ
ye kaun guzrā yahāñ se naqāb pahne hue
hamāre jism kī dīvār gir na jaa.e kahīñ
tumhāre hijr kā mausam hai aab pahne hue
chaman se ḳhushbū nikal kar havā se pūchhtī hai
kisī ko dekhā hai tum ne gulāb pahne hue
hamāre takiye pe kal niiñd sar paTaktī rahī
hamārī aañkh thī ek aisā ḳhvāb pahne hue
kisī ne hindavī to reḳhta kisī ne kahā
zabān-e-urdu hai kyā kyā ḳhitāb pahne hue
koī bhī sinf-e-suḳhan is tarah nahīñ ‘dilbar’
ġhazal hī tanhā hai har ik nisāb pahne hue