Anjum Fauqi Badayuni
mujh ko na aazma sitam-e-rozgar se
main tujh se duur huun na tire iḳhtiyar se
badlenge ahl-e-dil na kisi e’tibar se
sarkar dushmani se navazen ki pyaar se
ye kya ki sirf rang gulistan badal diya
ham ne kuchh aur bhi to kaha tha bahar se
yarab ye kis nahaj pe hain dil ke muamalat
ham ghair-mutma.in se na vo be-qarar se
aḳhir ḳhud apne samne aana paḌa hamen
ukta chuke the silsila-e-intizar se
barse hain kis ke ḳhuun ke badal chaman chaman
laa.i kahan se rang ye puchho bahar se
ham ro liye ki sabz-o-gul men tari rahe
hanste agar to aag barasti bahar se
be-shak hai na-ḳhuda ki mohabbat bhi un ke saath
‘anjum’ ḳhuda ka naam jo lete hain pyaar se
Leave a Reply