Poet
jo har qadam pe andheron se laḌne vaale hain
hamare saath mohabbat ke vo ujale hain
vo jante hain jo tariḳh paḌhne vaale hain
hamin ne gardish-e-dauran ke bal nikale hain
bana.e phirte hain ham ḳhud ko ḳhush-libas magar
hamare ghar men abhi makḌiyon ke jaale hain
ḳhulus-o-rabt-o-mohabbat jinhen mayassar hai
vo log kaun si duniya ke rahne vaale hain
dayar-e-ghair men tum kyuun talash karte ho
hamare shahr men kya ahl-e-fan ke laale hain
jinhen ye ahl-e-basirat sameT laa.e the
vo hadse kisi ashufta sar ne Taale hain
hazar daur-e-taraqqi ke ba.ad bhi ‘nusrat’
qadam qadam pe abhi ‘mir’ ke havale hain
Leave a Reply