Jo Har Qadam Pe Andheron Se laDne Wale Hain

jo har qadam pe añdheroñ se laḌne vaale haiñ

hamāre saath mohabbat ke vo ujāle haiñ

vo jānte haiñ jo tārīḳh paḌhne vaale haiñ

hamīñ ne gardish-e-daurāñ ke bal nikāle haiñ

banā.e phirte haiñ ham ḳhud ko ḳhush-libās magar

hamāre ghar meñ abhī makḌiyoñ ke jaale haiñ

ḳhulūs-o-rabt-o-mohabbat jinheñ mayassar hai

vo log kaun sī duniyā ke rahne vaale haiñ

dayār-e-ġhair meñ tum kyuuñ talāsh karte ho

hamāre shahr meñ kyā ahl-e-fan ke laale haiñ

jinheñ ye ahl-e-basīrat sameT laa.e the

vo hādse kisī āshufta sar ne Taale haiñ

hazār daur-e-taraqqī ke ba.ad bhī ‘nusrat’

qadam qadam pe abhī ‘mīr’ ke havāle haiñ

Leave a Comment