Jaikrishn Chaudhry Habeeb
chaman chaman se gulon ka yahi payam aaya
vahi hasin hai jo duniya men shad-kam aaya
miri taraf ko uThi yuun nigah saaqi ki
ki jaise daur men labrez mai ka jaam aaya
ḳhud un ke ruḳh se hua un ke dil ka haal ayaan
jo bhule-bisre kabhi lab pe mera naam aaya
baḌha ke haath zamane ne us se chhin liya
jo ek lahja bhi lab tak kisi ke jaam aaya
sada-e-pir-e-mughan thi ye bazm-e-rindan men
hai is ka mai-kada qabze men jis ke jaam aaya
harim-e-naz se aa to gaya huun main lekin
pukarta hua koi har ek gaam aaya
main gum hi tha abhi tarikiyon men maazi ki
ki sub.h-e-nau ki kiran ka mujhe salam aaya
ḳhayal-e-yar ki mad-hoshiyan ma.az-allah
miri nazar na uThi jab vo su-e-bam aaya
ḳhirad ki saari ga.i puḳhta-kariyan be-kar
bas ek shauq ka sauda-e-ḳham kaam aaya
‘habib’ dad-e-suḳhan mil ga.i mujhe us roz
pasand-e-tab.a jab un ko mira kalam aaya
Leave a Reply