Yaqoob Parwaz
dil ke luTne pe kya kare koi
kis se ja kar pata kare koi
sochta huun ki kis bharose par
jaan tum par fida kare koi
ya.ani umr-e-ḳhizar to hasil ho
chand sanson ka kya kare koi
ek hi to sada-e-majnun hai
mere dukh ki dava kare koi
us pe lazim usi ka ho jaana
jis ko kuchh bhi ata kare koi
koi rasta nikal hi aata hai
ik zara aasra kare koi
gaah chalti ba-gah rukti hai
aisi dhaḌkan ka kya kare koi
juun farishta ajal ka aata hai
aise vada-vafa kare koi
saḳht mushkil hai fil-badih kahna
chhed hiire men kya kare koi
Leave a Reply