Mohammad Ismail Aasi Aarwi
kahan kisi ki nazar hai tiri nazar ki tarah
jo kaam dil ka bhi karti chale jigar ki tarah
bahut se aise bhi duniya men log milte hain
jo ba-ḳhabar hain magar hain vo be-ḳhabar ki tarah
ye barbariyat-o-vahshat ye aag aur ye dhuan
bashar ko rahna bhi mushkil hai ab bashar ki tarah
asir-e-hur hain vaa.iz ab un ki kaun sune
kahani aap ki hai tul-e-muḳhtasar ki tarah
barasne ko to barasta hai abr-e-naisan bhi
magar baras na saka meri chashm-e-tar ki tarah
na jaane kaun se aalam men gum hua ‘asi’
na ba-ḳhabar ki tarah hai na be-ḳhabar ki tarah
Leave a Reply