poet

Qafas-Nasibon Ka Uf Haal-e-Zar Kya Hoga

qafas-nasibon ka uf hal-e-zar kya hoga

phir aa rahi hai chaman men bahar kya hoga

dil-o-jigar pe liye honge zakhm kitnon ne

koi hamari tarah dil-e-figar kya hoga

isi khayal se main arz-e-shauq kar na saka

haya se rang-e-rukh-e-tab-dar kya hoga

bahar de na saki ek phuul ko bhi nikhar

khizan ke saath hai rang-e-bahar kya hoga

fasurda lala-o-gul hain ravish ravish hai udaas

chaman men aise men jashn-e-bahar kya hoga

khadang-e-naz ne kuchh is tarah kiya zakhmi

jo dil ke zakhm hain un ka shumar kya hoga

kabhi ki tuut gai aas raat bhiig gai

kisi ke aane ka ab intizar kya hoga

More Poems

Leave a Comment