Dil Ayubi
kahan main abhi tak nazar aa saka huun
ḳhuda jaane kitni tahon men chhupa huun
ye kis ne sada di mujhe zindagi ne
magar main to sadiyan huiin mar chuka huun
ye kah kar to manzil ne dil toḌ Daala
jahan se chala tha vahi marhala huun
ye dilchasp va.ade ye rangin dilase
ajab sazishen hain kahan aa gaya huun
tira qurb hasil hua bhi to kya hai
vahi fasla tha vahi fasla huun
Leave a Reply