charag apni thakan ki koi safa.i na de
vo tirgi hai ki ab ḳhvab tak dikha.i na de
masarraton men bhi jaage gunah ka ehsas
mire vajud ko itni bhi parsa.i na de
bahut satate hain rishte jo TuuT jaate hain
ḳhuda kisi ko bhi taufiq-e-ashna.i na de
main saari umr andheron men kaaT sakta huun
mire diyon ko magar raushni para.i na de
agar yahi tiri duniya ka haal hai malik
to meri qaid bhali hai mujhe riha.i na de
dua ye mangi hai sahme hue muarriḳh ne
ki ab qalam ko ḳhuda surḳh raushna.i na de
Leave a Reply