Ada-E-Husn Ki Husn-E-Ada Ki Baat Hoti Hai

Rishi Patialvi

ada-e-husn ki husn-e-ada ki baat hoti hai

vafa ki azma.ish par jafa ki baat hoti hai

ye kaisa daur-daura hai qalam-ru-e-mohabbat men

buton ka hukm chalta hai ḳhuda ki baat hoti hai

koi gunja.ish-e-faryad-o-shikva tak nahin baaqi

ḳhata-e-be-gunahi par saza ki baat hoti hai

bhar aata hai dil-e-mahrum-e-pursish dard-mandi se

kahin bhi jab kisi dard-ashna ki baat hoti hai

phir us ke ba.ad kaam aata hai jazba Duub marne ka

talatum tak ḳhuda-o-na-ḳhuda ki baat hoti hai

duaon ke bharose par bigaḌte kaam bante hain

dava be-sud Thahre to dua ki baat hoti hai

‘rishi’ qanun-e-qudrat hai amal-dari taghayyur ki

maqam-e-intiha par ibtida ki baat hoti hai