jin se rabt-e-ḳhas ho kyon mujh ko begana kahen
apna divana banaya hai to divana kahen
ban kar arman-e-mohabbat jo dilon par chha sake
kahne vaale bhi kahen to aisa afsana kahen
be-ḳhabar hai apne andaz-e-dil-ara.i se husn
kyon na us ko ishq se bhi baḌh ke divana kahen
dil ki betabi ka raaz aur us ki barbadi ka haal
sun sako ham se to afsana-dar-afsana kahen
jaan se baḌh kar hain pyare dil se baḌh kar hain aziiz
mahfil-e-ahbab men ham kis ko begana kahen
dars-e-ulfat hai zamane ke liye mera junun
shauq se ahl-e-basirat mujh ko divana kahen
iltija-e-shauq ho lab par na arz-e-mudda.a
kaif-avar ho jo ham nazron se afsana kahen
jhuk gaya sar arz-e-matlab par bara-e-iḳhtisar
ham ne chaha tha ki afsana-dar-afsana kahen
kaif ki dariya baha deti hai saaqi ki nazar
kyon na ham ai mai-paraston is ko mai-ḳhana kahen
dil-navazi dilbari ki us se kya ummid ho
jo hamari sarguzisht-e-gham ko afsana kahen
ne.amat-e-gham se jo dil mahrum ho vo dil nahin
jaam ḳhali ho to kyon kar us ko paimana kahen
kuchh lihaz-e-jazb-e-ulfat kuchh ḳhayal-e-zabt-e-shauq
kis tarah ham un se apne gham ka afsana kahen
ye bhi us ka naqsh hai to vo bhi us ka aks hai
farq hi kya hai haram samjhen ki but-ḳhana kahen
ek arman ho to us ki be-kasi ko roiye
umr bhar ke hadson ka kyun-kar afsana kahen
jo bhi hain sub.h-e-vatan hi ke parastaron men hain
kin se ham ai sham-e-ghurbat tera afsana kahen
un se kahiye bhi to kahiye hal-e-dil kya ai ‘kanval’
jo hamari har haqiqat ko ik afsana kahen
Leave a Reply