mujhe ab naya ik badan chahiye
aur us ke liye bankpan chahiye
main ye sochta huun asar ke liye
sada chahiye ya suḳhan chahiye
bhaTakne se ab main bahut tang huun
zamin qaid kar le vatan chahiye
nashe ke liye ik naya shisha ho
aur us men sharab-e-kuhan chahiye
ye ankhen ye dil ye badan hai tira
tujhe aur kya jan-e-man chahiye
bahut tursh lagne lagi zindagi
koi miThi miThi chubhan chahiye
Leave a Reply