Anwar Anjum
jab se paḌi hai un se mulaqat ki tarah
aati nahin giraft men halat ki tarah
aaya jo likhte likhte tire qurb ka ḳhayal
ḳhat bhi ulajh gaya hai miri baat ki tarah
tanha.i men milo to tumhen dil ke as-pas
dikhla.en ek shahr-e-tilismat ki tarah
yunhi jo bandhte rahe tamhid aaj bhi
ye shab bhi biit ja.egi kal raat ki tarah
‘anvar’ yuun to dil bhi hai ik anjuman magar
aaseb men ghiri hui barat ki tarah
Leave a Reply