Rizvan Anjum
dayar-e-ghair se ho kar dayar-e-yar ja.ega
jahan se jab bhi koi sahab-e-kirdar ja.ega
nafi ki kaj-ada.i men nihan isbat ka aalam
jahan iqrar na pahuncha vahan inkar ja.ega
bina soche bina samjhe ye andhe saath ho lenge
kahin se to hamara qafila-salar ja.ega
ḳhudi ke par nikal aa.en jo is mad.hosh insan men
to ye shahkar qudrat ka ufuq ke paar ja.ega
faqat aslaf ke kirdar par apna amal ho to
kisi dushman ka bhi ho vaar vo be-kar ja.ega
ḳhuda se baḳhshva dega kisi ka ek hi aansu
kisi ka umr bhar rona vahan be-kar ja.ega
bhale anjam jo bhi ho vahan bolunga main ‘anjum’
jahan ḳhamosh rahne se mira kirdar ja.ega
Leave a Reply