Tark-E-Mohabbat Ke Baad

ghair ki ho ke bhi tum meri mohabbat chaho

is ghata-top andhere men ye taare kaise

farsh par jis ko abhi tak na mili jaae panah

arsh se chand ka aivan utare kaise

jis ki rahon pe bhatakte hue jag biite hain

phir usi dasht ko bad-bakht sudhare kaise

qafile aae gae gard uthi baith gai

ab musafir ko ufuq par se ishare kaise

jin ki taqdir men tha daman-e-gulchin ka mazar

vo shagufe to parae hain hamare kaise

pesh kar sakta huun lekin tujhe bahlane ko

chandni-rat men machle hue ruman ki yaad

bed-e-majnun ke tilismat se pal-pal chhanti

asmanon ko lapakti hui ik taan ki yaad

meri varaftagi-e-shauq ki sun kar rudad

tiri ankhon men damakte hue arman ki yaad

donon chehron pe shafaq donon jabinon pe araq

donon sinon men dhadakte hue haijan ki yaad

kaun hain aap miri ziist ki tanhai sathi

pahli pahchan ki yaad akhiri paiman ki yaad

Leave a Comment