Poet
vafa se pasheman jafa ho rahi hai
mohabbat ki qimat ada ho rahi hai
dava ho rahi hai dua ho rahi hai
magar dil ki uljhan siva ho rahi hai
Duboi hai jis ne abhi dil ki kashti
vahi aas phir naḳhuda ho rahi hai
gulon men bhi hai rang beganagi ka
ajab is chaman ki hava ho rahi hai
nigahon se parde haTe ja rahe hain
ḳhudi ki ḳhuda.i fana ho rahi hai
talab par bhi husn-e-talab ki hai koshish
nazar kuchh mizaj-ashna ho rahi hai
mire dard ki ibtida karne vaale
tire zulm ki intiha ho rahi hai
tiri raah men miTne valon ki qismat
fana ko bhi hasil baqa ho rahi hai
sitam ko sitam ‘jurm’ hargiz na kahte
agar ye samajhte ḳhata ho rahi hai
Leave a Reply