Dair-O-Haram Ko Chhod Ke Ai Dil Chal Baitho Maikhane Mein

dair-o-haram ko chhod ke ai dil chal baitho maikhane men

khuub guzar jaegi apni saaqi se yarane men

sair tabiat ho jaegi nasha jo hai hovega vahi

farq nahin hai saaqi hargiz chullu men paimane men

ruuh hai jab tak jism ke andar jism pe mere raunaq hai

kashana abad hai jab tak bulbul hai kashane men

dast-e-tamanna qata hua barbad hui hai hirs-o-hava

ziist ki surat apni bandhi ai nafs tire mar jaane men

sach hai dil ko apne bhi juz yaad sanam kuchh dhyan nahin

dekh to ai naseh kaisi hushyari hai divane men

fikr-e-duniya se hain chhute is ranj-e-jahan se paai najat

laakh tarah ki rahat paai ik apne mar jaane men

pesh-e-junun-e-bakhta ai dil maut to ziist se khush-tar hai

shama ke aage raqs-kunan tha parvana jal jaane men

husn-e-nairang us mah-ru ka dil-e-hazin men rahta hai

chashm-e-bina ho to dekhe basti hai virane men

naqsh-e-mohabbat kahin na paaya lauh-e-dil par insan ke

phira qalam ki surat se main barson ik ik khane men

Leave a Comment