Soch Mein Gum Be-Karan Pahnaiyan

soch meñ gum be-karāñ pahnā.iyāñ

ishq hai aur hijr kī tanhā.iyāñ

raat kahtī hai ki kaTne kī nahīñ

dard kahtā hai karam-farmā.iyāñ

bain kartī hai darīchoñ meñ havā

raqs kartī haiñ siyah parchhā.iyāñ

ḳhāmushī jaise koī āh-e-tavīl

siskiyāñ letī huī tanhā.iyāñ

kaun tū hai kaun maiñ kaisī vafā

hāsil-e-hastī haiñ kuchh rusvā.iyāñ

yaad se terī sukūñ yuuñ aa gayā

sub.h dam jaise chaleñ purvā.iyāñ

Leave a Comment