nashshe men jo hai kohna sharabon se ziyada
us jism ki ḳhushbu hai gulabon se ziyada
ik qatra-e-shabnam ko taraste hain gulistan
ye fasl to mumsik hai sarabon se ziyada
paḌhna hai to insan ko paḌhne ka hunar siikh
har chehre pe likkha hai kitabon se ziyada
pahuncha huun vahin par ki chala tha main jahan se
hasti ka safar bhi nahin ḳhvabon se ziyada
ye bikhri hui zindagi yakja nahin hoti
kam hone pe bhi ham hain ḳharabon se ziyada
‘farigh’ kabhi ghaTti hi nahin dard ki daulat
hoti hai hamesha ye hisabon se ziyada
Leave a Reply