ilahi kaash gham-e-ishq kaam kar jaa.e
jo kal guzarni hai mujh par abhi guzar jaa.e
tamam umr rahe ham to ḳhair kanTon men
ḳhuda kare tira daman gulon se bhar jaa.e
zamana ahl-e-ḳhirad se to ho chuka mayus
ajab nahin koi divana kaam kar jaa.e
hamara hashr to jo kuchh hua hua lekin
dua ye hai ki tiri aqibat sanvar jaa.e
nigah-e-shauq vahi hai nigah-e-shauq ‘shamim’
jo ek baar ruḳh-e-yar par Thahar jaa.e
Leave a Reply