Akhtar Ansari Akbarabadi
sharab aae to kaif-o-asar ki baat karo
piyo to bazm men fikr-o-nazar ki baat karo
fasana-e-ḳham-e-gesu men kaif kuchh bhi nahin
nizam-e-alam-e-zer-o-zabar ki baat karo
chaman men daam bichhata hai vaqt ka sayyad
gulon se hausla-e-bal-o-par ki baat karo
qaba-e-zohd ki pakizgi to dekh chuke
sharab-ḳhane men daman-e-tar ki baat karo
kahaniyan shab-e-hijran ki ho chuki hain tamam
sahar tulua hui hai sahar ki baat karo
chaman chaman men udhar ho rahi hai had-bandi
khuli fazaen jidhar hain udhar ki baat karo
gulon ka zikr baharon men kar chuke ‘aḳhtar’
ab aao hosh men barq-o-sharar ki baat karo
Leave a Reply