Ganw Rafta Rafta Bante Jate Hain Ab Shahr

gaañv rafta rafta bante jaate haiñ ab shahr

qarya qarya phail rahā hai tanhā.ī kā zahr

mujh ko Dastā rahtā hai bas har dam yahī ḳhayāl

ek hī ruḳh par kyuuñ bahtā hai dariyā āThoñ pahr

kaun sā bhūlā-bisrā ġham thā jo aayā hai yaad

rah rah kar phir dil meñ uTThe dard kī mīThī lahar

merā jiite rahnā bhī to ban gayā ek azaab

lekin merā marnā bhī to ho jā.egā qahr

lagtā hai kuchh anhonī sī hone vaalī hai

darham-barham hone ko hai jaise nizām-e-dahr

Leave a Comment