shabab-e-mausam hare chaman men utarna hai
kamal jitna bhi hai suḳhan men utarna hai
ḳhuda-e-fan tu mire qalam men utar ki main ne
kisi ko ghazlon ke pairahan men utarna hai
vo jitna sona bhi koh-e-sar men paḌa hua hai
bana ke kundan kisi badan men utarna hai
nikhar de jo miri nazar ke tamam manzar
vo nuur sar ke ujaḌ-ban men utarna hai
abhi se zulmat-kade men thak kar niDhal ho tum
abhi to suraj kiran kiran men utarna hai
ye apni fitrat hai ya ki sada-dili hai yaaro
jo hans ke bole use bhi man men utarna hai
hamen ḳhabar hai ki kya hai ye shaghl-e-sher-goi
ki resha resha jigar ka fan men utarna hai
kisi ko ‘tahir-adim’ masnad ye saunpni hai
kisi ko dil ke akele-pan men utarna hai
Leave a Reply