Azeem Murtaza
afsana-e-hayat-e-pareshan ke saath saath
duniya badal ga.i gham-e-pinhan ke saath saath
betabi-e-hayat men asudgi bhi thi
kuchh tera gham bhi tha gham-e-dauran ke saath saath
ab mere saath un ki nazar bhi hai be-qarar
nashtar taḌap rahe hain rag-e-jan ke saath saath
ab imtiyaz-e-zahir-o-batin bhi miT gaya
dil chaak ho raha hai gareban ke saath saath
nairangi-e-jahan-e-talab dekhna ‘azim’
baḌhta hai shauq tangi-e-daman ke saath saath
Leave a Reply