Masoom Ansari
main be-aman sahi phir bhi ye guman to hai
zamin hai paanv tale sar pe asman to hai
har ek lamha kisi tiir ka hai Dar lekin
main mutma.in huun ki mere paron men jaan to hai
main is tarah dar-o-divar se huun begana
ki ghar nahin na sahi ghar ka ik nishan to hai
main apni kashti-e-ummid se nahin mayus
phaTa purana sahi phir bhi badban to hai
main apni zaat se bahar nikal ke sochta huun
nahin hai rabt magar mera ḳhandan to hai
charagh-e-jan ka muqaddar ho jo bhi ai ‘ma.asum’
hava ke samne masruf-e-imtihan to hai
Leave a Reply