Saud Usmani
ankhon men ek ḳhvab pas-e-ḳhvab aur hai
ik mauj-e-tund-o-tez tah-e-ab aur hai
un se bhi meri dosti un se bhi ranjishen
siine men ek halqa-e-ahbab aur hai
shayad kabhi khule ye mire naghmagar pe bhi
ye saz-e-jism aur hai mizrab aur hai
chaliye kahin zamin ki kashish kuchh to kam hui
ḳhushki pe jism aur tah-e-ab aur hai
phir aa na jaa.e lauT ke ye zalzala abhi
jo aa ke tham gaya tha vo sailab aur hai
is a.ine pe gard ke chehre miTa ke bhi
miTTi ka ek naqsh pas-e-ab aur hai
itni siyah-rat men itni si raushni
ye chand vo nahin mira mahtab aur hai
Leave a Reply