Aziz Hamid Madni
talḳh-tar aur zara bada-e-safi saaqi
mere siine men ḳhas-o-ḳhar hain kaafi saaqi
zulmat o nuur ko pyalon men samo deti hai
shaam paḌte hi tiri chashm-e-ghilafi saaqi
zahr ka jaam hi de zahr bhi hai ab-e-hayat
ḳhushk-sali ki to ho jaa.e talafi saaqi
nashsha-e-mai se zara zaḳhm ke Tanke TuuTe
ta-abad silsila-e-sina-shigafi saaqi
zindagani ka maraz kam nahin hone paata
ye maraz kam na ho allah hai shafi saaqi
kaaT di gardish-e-ayyam ki zanjir us ne
kaun hai gardish-e-mina ke munafi saaqi
ik kaf-e-ju hai mata-e-ḳhirad o sikka-e-hosh
jam-e-mai de ki ye aalam hai izafi saaqi
Leave a Reply