satven number ki surat vo bhi pur-asrar tha
main sifar ki tarah sab kuchh tha magar be-kar tha
har-nafas ab tak mire dil ki ajab halat rahi
maut se Darta bhi tha jiine se bhi bezar tha
ik shanasa na-shanasa.i thi mere har taraf
mera ghar mere liye to ghar na tha bazar tha
meri barbadi ka zamin dusra koi nahin
main ki apne vahimon ka aap zimmedar tha
jism hi kya ruuh tak zaḳhmon se chhalni ho ga.i
saans ka rishta na tha chalti hui talvar tha
ab bhala hasil bhi kya hoga ba-juz sharmindagi
kya kahun ‘shadab’ kis se barsar-e-paikar tha
Leave a Reply