Shab-E-Visal Jo Pahna Tere Badan Ka Libas

shab-e-visāl jo pahnā tire badan kā libās

tamām umr na bhāyā kisī bhī tan kā libās

ajiib sañg tarāshā hai dast-e-qudrat ne

tire badan pe qayāmat hai bāñkpan kā libās

hameñ hai shauq tirā maḳhmalīñ badan pahneñ

ḳhafā hai ham se yuuñ nargis kā nastaran kā libās

maiñ sher kahte hue bhī usī ko sochtā huuñ

basā hai us kī hī ḳhushbū meñ fikr-o-fan kā libās

maiñ us ke jism ke har zāviye ko bhāñp gayā

pahan ke aayā thā zālim ajab chalan kā libās

vo surḳh-posh zarā der ko chaman meñ gayā

to ek lamhe meñ phīkā paḌā chaman kā libās

tirī hī zaat to mehvar hai shā.irī kā mirī

tire ḳhayāl ko detā huuñ maiñ suḳhan kā libās

Leave a Comment