Nasir Amrohvi
shab-e-visal jo pahna tire badan ka libas
tamam umr na bhaya kisi bhi tan ka libas
ajiib sang tarasha hai dast-e-qudrat ne
tire badan pe qayamat hai bankpan ka libas
hamen hai shauq tira maḳhmalin badan pahnen
ḳhafa hai ham se yuun nargis ka nastaran ka libas
main sher kahte hue bhi usi ko sochta huun
basa hai us ki hi ḳhushbu men fikr-o-fan ka libas
main us ke jism ke har zaviye ko bhanp gaya
pahan ke aaya tha zalim ajab chalan ka libas
vo surḳh-posh zara der ko chaman men gaya
to ek lamhe men phika paḌa chaman ka libas
tiri hi zaat to mehvar hai sha.iri ka miri
tire ḳhayal ko deta huun main suḳhan ka libas
Leave a Reply