Kya KHabar Thi Ishq Mein Aisa Bhi Ek Daur Aae Hai

Poet

kya ḳhabar thi ishq men aisa bhi ik daur aa.e hai

baat kaisi saans leta huun to ji ghabra.e hai

rahm kar jazb-e-mohabbat ye sitam kyon Dhaa.e hai

husn aur betab-o-hairan kis se dekha jaa.e hai

yuun to un ki yaad se milti hai taskin-e-hayat

aur jab taḌpa.e hai zalim bahut taḌpa.e hai

ḳhushk ankhen muskurate honT chehra mutma.in

yuun bhi aksar dastan-e-gham suna.i jaa.e hai

aur to kya zindagi ka hosh tak chhoḌa nahin

luTne vaale kahin aise bhi luuTa jaa.e hai

rang-e-gulshan dekhne vaale kabhi ye bhi to dekh

nannhi nannhi pattiyon men kaun ras dauḌaye hai

ishq ke maare hue duniya ko dekhen bhi to kya

jab nazar uThti hai koi samne aa jaa.e hai

husn chhupta phir raha hai muḳhtalif pardon men ‘kaif’

ishq ki zalim nazar ke samne kaun aa.e hai