Zafar Iqbal
ek hi naqsh hai jitna bhi jahan rah jaae
aag udti phire har-su ki dhuan rah jaae
kuchh gharaz is se nahin rizq-e-gada ho ki na ho
kucha-o-rah men avaz-e-sagan rah jaae
ye safar vo hai ki itna bhi ghanimat hai agar
apne ham-rah yahi khaak ravan rah jaae
aur kuchh rose ruke sust lahu ka mausam
aur kuchh der yahi rang-e-khizan rah jaae
aaj kal us ki tarah ham bhi hain khali khali
ek do din use kahiyo ki yahan rah jaae
kuchh to rah jaae tag-o-taz talab men baaqi
vahm apna rahe ya us ka guman rah jaae
vo tamanna huun ki dil se na guzar ho jis ka
vo tamasha huun ki nazron se nihan rah jaae
ye bhi ik marhala-e-sakht hai ai sahab-e-tarz
ki bayan ki jagah andaz-e-bayan rah jaae
naam to phir bhi badi baat hai duniya men ‘zafar’
ye bhi kya kam hai jo kuchh apna nishan rah jaae
Leave a Reply