Bekhud Dehlvi
bevafa kahne se kya vo bevafa ho ja.ega
tere hote is sifat ka dusra ho ja.ega
shart kar lo phir mujhe barbad hona bhi qubul
ḳhaak men mil kar to hasil mudda.a ho ja.ega
sar na hoga dosh par to kya na hogi guftugu
hichkiyon se shukr qatil ka ada ho ja.ega
siina toḌa dil men chuTki li jigar zaḳhmi kiya
kya ḳhabar thi tiir bhi teri ada ho ja.ega
mere kahne men hai dil jab tak mire pahlu men hai
aap le liije ise ye aap ka ho ja.ega
saath un ke jaan bhi arman bhi ja.enge aaj
sub.h se pahle ravana qafila ho ja.ega
main malun talvon se ankhen vo kahen samjhunga main
yaad rakh phika agar rang-e-hina ho ja.ega
phir vahi jhagḌe ka jhagḌa hai agar qum kah diya
tegh ka mansuḳh saara faisla ho ja.ega
kis ḳhushi men haa.e kaisa ranj phaila kya karun
kya ḳhabar thi hanste hanste vo ḳhafa ho ja.ega
hashr tak kyuun baat jaa.e kyuun paḌe ghairon ke munh
ghar men samjhauta hamara aap ka ho ja.ega
aankh se hai vasl ka iqrar dil dugda men hai
tum zaban se apni kah doge to kya ho ja.ega
zulm se gar zab.h bhi kar do mujhe parva nahin
lutf se Darta huun ye meri qaza ho ja.ega
us ne chheḌa tha mujhe tum jaan doge kab hamen
kah diya main ne bhi jab vaada vafa ho ja.ega
yuun saval-e-vasl par Taala kiya barson koi
sabr kar muztar na ho tera kaha ho ja.ega
laakh duniya men hasin hon laakh huren ḳhuld men
mujh ko jo tu hai vo koi dusra ho ja.ega
tauba bhi kar li thi ye bhi nashsha ki thi ik tarang
aap samjhe the ki ‘beḳhud’ parsa ho ja.ega
Leave a Reply