Razi Akhtar Shauq
ham jahan naghma-o-ahang liye phirte hain
log hathon men vahan sang liye phirte hain
ham hi is ahd ka me.yar-e-taghayyur honge
ham ki har daur men sau rang liye phirte hain
kya ho shorida-saron ki guzar auqat ki log
dast-e-be-faiz-o-dil-e-tang liye phirte hain
sab tira husn tire husn-e-sahi-qad men nahin
ham bhi ankhon men ajab rang liye phirte hain
‘shauq’ dushvar hai ab mo.ajiza-e-fan ki numud
log ash.ar men farhang liye phirte hain
Leave a Reply