karam ka aur hai imkan khule to baat chale
is iltifat ka unvan khule to baat chale
kis intizar men thi ruh-e-ḳhud-numa.i-e-gul
baras ke abr-e-baharan khule to baat chale
kuchh ab ke ham bhi kahen us ki dastan-e-visal
magar vo zulf-e-pareshan khule to baat chale
jafa ye silsila-e-sad-hazar-unvan hai
qamis-e-yusuf-e-kan.an khule to baat chale
safar hai aur sitaron ka ik bayaban hai
musafiri ka bhi imkan khule to baat chale
tilism-e-sheva-e-yaran khula to kuchh na hua
kabhi ye habs-e-dil-o-jan khule to baat chale
sulag raha hai ufuq bujh rahi hai atish-e-mahr
rumuz-e-rabt-e-gurezan khule to baat chale
Leave a Reply