lutf ab ziist ka ai gardish-e-ayyam nahin
mai nahin yaar nahin shisha nahin jaam nahin
kab mujhe yaad rukh o zulf-e-siyah-fam nahin
koi shaghl is ke siva subh se ta shaam nahin
har sukhan par mujhe deta hai vo bad-khu dushnam
kaun si baat miri qabil-e-inam nahin
nek-nami men dila firqa-e-ushshaq hain ishq
hai vo badnam mohabbat men jo badnam nahin
chehra-e-yar ke saude men kaha karta huun
rukh hai ye subh nahin zulf hai ye shaam nahin
bosa ankhon ka jo manga to vo hans kar bole
dekh lo duur se khane ke ye badam nahin
halqa-e-zulf-e-butan men hai bhari nikhat-e-gul
ai dil is laam men bu-e-gul-e-islam nahin
ibtida ishq ki hai dekh ‘amanat’ hushyar
ye vo aghaz hai jis ka koi anjam nahin
Leave a Reply