ḳhatm shab qissa-e-muḳhtasar na hui
sham.a gul ho ga.i sahar na hui
ru-e-shabnam jala jo ghar mera
phuul ki kam hansi magar na hui
hashr men bhi vo kya milenge hamen
jab mulaqat umr-bhar na hui
a.ina dekh kar ye kijiye shukr
aap ko aap ki nazar na hui
sab the mahfil men un ki mahv-e-jamal
ek ko ek ki ḳhabar na hui
sainkaḌon raat ke kiye va.ade
un ki raat aaj tak ‘qamar’ na hui
Leave a Reply