ye jaur ahl-e-aza par mazid karte rahe
sitam-shi.ar moharram men iid karte rahe
hamare dam se raha daur-e-bada-paima.i
ki apne ḳhuun se ham mai kashid karte rahe
gila to ye hai ki jitne amir-e-shahr hue
gharib-e-shahr ko sab na-ummid karte rahe
kiya hai ham ne hamesha hi karobar-e-ziyan
ki sasta bech ke mahnga ḳharid karte rahe
kisi se shahr-e-ḳhamoshan men kahte sunte kya
ham apne aap se guft-o-shunid karte rahe
vo zer-e-ḳhanjar-e-qatil na tha gulu koi
vo ik ḳhayal tha jis ko shahid karte rahe
mira kalam to kya naqdin-e-fan ‘mohsin’
kalam-e-haq men bhi qata-o-burid karte rahe
Leave a Reply