Iqbal Sajid
har ghaḌi ka saath dukh deta hai jan-e-man mujhe
har koi kahne laga tanha.i ka dushman mujhe
din ko kirnen raat ko jugnu pakaḌne ka hai shauq
jaane kis manzil men le ja.ega pagal-pan mujhe
saada kaghaz rakh ke aaya huun numa.ish-gah men
dekh kar hoti thi har tasvir ko uljhan mujhe
nachta tha paanv men lamhon ke ghungru bandh kar
de gaya dhoka simaT kar vaqt ka angan mujhe
nekiyon ke phal nahin lagte badi ke peḌ par
us ne vapas kar diya hai phir tahi-daman mujhe
dosto sun li ḳhuda ne kal miri pahli dua
sharm se aḳhir jhukani paḌ ga.i gardan mujhe
kya mila tujh ko bata andhe se laThi chhin kar
kar diya kyuun aas se mahrum jan-e-man mujhe
sard ho sakti nahin ‘sajid’ kabhi siine ki aag
dil jalane ko mila hai yaad ka indhan mujhe
Leave a Reply