kaun in lakhon adaon men mujhe pyari nahin
naam luun kis kis ka mujh ko ek bimari nahin
aag kitni le ke nikla tha mira dud-e-jigar
vo faza hai kaun jis men koi chingari nahin
yaas se kyuun dekhte hain dost ai azar-e-dil
puchhte hain kya mujhe to koi bimari nahin
haath rakh kar ik zara dekho tap-e-gham ka asar
ye tumhara hi jalaya dil hai chingari nahin
dil ne rag rag se chhupa rakkha hai tera raz-e-ishq
jis ko kah de nabz aisi meri bimari nahin
qaid ho kar main ne kholi ham-safiron ki zaban
kis gulistan men mira zikr-e-giraftari nahin
Leave a Reply