karunga zindagi men ḳhalq-ashna ho kar
savad-e-sang-e-jahan men ik aa.ina ho kar
ḳhizan ka daur hai aur dil men aarzu ye hai
ki main gulab khilata phirun saba ho kar
ye chup ka shahr mire saath jo suluk kare
main chup ke shahr men zinda rahun sada ho kar
jo hashr tak raha duniya men tirgi ka saman
to hashr tak main rahunga charagh-pa ho kar
mire sukut-o-sada ke sharik ho jaao
rah-e-hayat se guzrenge qafila ho kar
fana ka shahr hai ye ziist ka jahan ‘bedi’
yahan maro bhi to paighambar-e-baqa ho kar
Leave a Reply