Waheed Akhtar
ik dasht-e-be-aman ka safar hai chale-chalo
rukne men jaan o dil ka zarar hai chale-chalo
hukkam o sareqin ki go rah-guzar hai ghar
phir bhi bara.e-bait to dar hai chale–chalo
masjid ho madrasa ho ki majlis ki mai-kada
mahfuz shar se kuchh hai to ghar hai chale-chalo
zulmat hai yaan bhi vaan bhi andhere hi hon to kya
nuur ik vara-e-hadd-e-nazar hai chale-chalo
utra kinar-e-bahr-e-atsh ek qafila
ḳhatm us pe tishnagi ka safar hai chale-chalo
sar tak pahunch na jaa.e koi tez-gam lahar
yaan ḳhuun ki mauj ta-ba-kamar hai chale-chalo
jaan ke ziyan ka Dar hai talab men agar to ho
tark-e-talab men bhi to ḳhatar hai chale-chalo
Leave a Reply