muḌ ke dekhun to nahin koi magar lagta hai
ek saaya sa pas-e-gard-e-safar lagta hai
kaan dharta huun to hoti hai sama.at majruh
apni hi ḳhvahish-e-be-bak se Dar lagta hai
is tamashe se nikal paanv to ghar bhi dekhun
ye tamasha jo sar-e-rahguzar lagta hai
niind aa jaa.e to phir dhuup na saaya koi
paanv thak jaa.en to pardes bhi ghar lagta hai
aankh uThata huun to hai raah men haa.il divar
paanv rakhta huun to divar men dar lagta hai
kya qayamat hai ki aata hai na jaata hai koi
ik hayula pas-e-divar magar lagta hai
baat karta huun to maḳhmur sa ho jaata huun
us ki baton men ‘ziya’ mai ka asar lagta hai
Leave a Reply