Hayat Insan Ki Sar Ta Pa Zaban Malum Hoti Hai

Akhtar Ansari

hayat insan ki sar ta pa zaban malum hoti hai

ye duniya inqilab-e-asman malum hoti hai

mukaddar hai ḳhizan ke ḳhuun se aish-e-bahar-e-gul

ḳhizan ki rut bahar-e-be-ḳhizan malum hoti hai

mujhe nakami-e-paiham se mayusi nahin hoti

abhi ummid meri naujavan malum hoti hai

koi jab naala karta hai kaleja thaam leta huun

fughan-e-ghair bhi apni fughan malum hoti hai

ma.al-e-dard-o-gham dekho sada-e-saz-e-ishrat bhi

utar jaati hai jab dil men fughan malum hoti hai

chaman men andalib-e-zar ki fariyad ai ‘aḳhtar’

dil-e-nadan ko apni dastan malum hoti hai