Poet
jo qarz mujh pe hai vo bojh utarta ja.un
koi sune na sune main pukarta ja.un
miTa chuka huun jise apne safha-e-dil se
ghazal ghazal vahi chehra ubharta ja.un
na jaane mere ta.aqub men kaun kaun aa.e
main apne naqsh-e-kaf-e-pa ubharta ja.un
jo mere paas hai apne liye bacha rakkhun
jo mere paas nahin tujh pe varta ja.un
qadam qadam pe na.e log samne aa.en
qadam qadam pe na.e ruup dharta ja.un
kahin bane na ana meri raah men divar
ye tauq apne gale se utarta ja.un
muqabla to karun ‘rashid’ apne dushman se
ye aur baat hai jitun ki harta ja.un
Leave a Reply