Rehana Qamar
main apni zaat na apne makan men rahti huun
dhuen ka phuul huun atish-fishan men rahti huun
karam hai us ka jo deta hai shukr ke mauqe
karam hai us ka jo main imtihan men rahti huun
ye vasl bhi hai kisi aur justuju jaisa
kisi ke paas kisi ke guman men rahti huun
miri bahar abhi lauT kar nahin aa.i
main ḳhushk peḌ huun aur gulsitan men rahti huun
mire muamle pe aise chup hue hain log
ye lag raha hai ki main raftagan men rahti huun
mire qabile ko aadat hai kar-o-kari ki
main is ke ḳhauf se dar-ul-aman men rahti huun
‘qamar’ jo bigḌa hua hai mizaj dariya ka
use pata hai main kachche makan men rahti huun
Leave a Reply